ஒசாமா தப்பினால் கடித்துக்குதற நாய் அமெரிக்காவின் அதிரடி!

பாகிஸ்தான் தலைநகர் இஸ்லாமாபாத் அருகேயுள்ள அபோதாபாத்தில், ராணுவ பயிற்சிக் கல்லூரியில் இருந்து சில நூறு அடிகள் தூரத்தில் இருந்த பங்களாவில் பதுங்கியிருந்த சர்வதேச பயங்கரவாதி ஒசாமா பின்லாடனை, அமெரிக்கக் கடற்படையின் "சீல்' அதிரடிப்படையினர் கடந்த ஞாயிறன்று இரவு சுட்டுக் கொன்றனர். ஒசாமா பின்லாடனை கொல்ல, "சீல்' அதிரடிப்படையினர் 79 பேர், ஹெலிகாப்டரில் சென்ற போது, அவர்களுடன் ராணுவத்தில் சிறப்பு பயிற்சி பெற்ற மோப்ப நாயையும் அழைத்துச் சென்றனர். ஒசாமா தங்கியிருந்த பங்களாவின் மேல் பகுதியில், ஹெலிகாப்டரில் இருந்து கயிறு மூலம் "சீல்' அதிரடிப்படையினர் இறங்கிய போது, அவர்களுடன் கழுத்தில் தோல்பட்டை கட்டப்பட்ட அந்த நாயும் இறக்கப்பட்டது.

அமெரிக்க ராணுவத்தில் பயிற்சி பெறும் இந்த நாய்கள் கடித்தால், அது ஒரே நேரத்தில் பல கிலோ சதையை குதறிவிடும், மேலும், மனிதர்களுக்கு அளிக்கப்படும் பயிற்சிகளைப் போலவே, இந்த நாய்களுக்கும் ராணுவத்தில் கடும் பயிற்சி அளிக்கப்படுகிறது. அந்த நாய்களை கையாள்பவர், அவை எந்த பொருளை முகர்ந்து பார்க்கின்றன என்பதை ஆயிரம் அடி தூரத்தில் இருந்தே கண்காணிக்க முடியும். மேலும், நாய் அணிந்திருக்கும் உடையில் இருக்கும் ஸ்பீக்கர் மூலம், அதற்கு உத்தரவு பிறப்பிக்கவும் முடியும். வெடிகுண்டுகளை கண்டறியவும், போர்க்களத்தில் இருக்கும் ராணுவ வீரர்களுக்கு உதவவும், அமெரிக்க ராணுவத்தில் தற்போது இதுபோன்ற 2,800 நாய்கள் உள்ளன.