தமிழக மின்வாரியத்தில், பழைய கறுப்பு மீட்டர் பெட்டிகளை மாற்றாததால், பல கோடி ரூபாய் இழப்பு ஏற்பட்டுள்ளது. தமிழகம் முழுவதும் பழமையான, 18 லட்சம் கறுப்பு மீட்டர்களால் ஆண்டுக்கு, 700 கோடி ரூபாய்க்கு மேல் இழப்பு ஏற்படலாம் என, மின்வாரியம் கண்டுபிடித்துள்ளது. தமிழகத்தை மின்வெட்டு இல்லாத மாநிலமாக்க நடந்து வரும் ஆய்வில், இது புதிய கண்டுபிடிப்பு. கடந்த கால பிரச்னைகளை ஆய்வு செய்து, மின்துறையின் நஷ்டத்தை சரிக்கட்டத் தேவையான முயற்சிகள் மேற்கொள்ளப்பட்டுள்ளன. தமிழகம் முழுவதும், 2.80 கோடி மின் நுகர்வோர்கள் பயன்படுத்தும் மீட்டர்களின் நிலை குறித்து, மின்துறையின் தொழில்நுட்பக் கருவிகள் மேலாண்மைப் பிரிவு சர்வே எடுத்துள்ளது. இதில், 18 லட்சம் கறுப்பு மீட்டர்கள் என்ற,"மெக்கானிக்கல் மீட்டர்கள்' இருப்பதை கண்டுபிடித்துள்ளனர்.
இதுகுறித்து, மின்துறை ஆய்வாளர் ஒருவர் கூறியதாவது: கடந்த 10 ஆண்டுகளுக்கு முன்பு வரை, அனைத்து மின் நுகர்வோர்களுக்கும், கறுப்பு வண்ண இரும்புப் பெட்டி போன்ற மெக்கானிக்கல் மீட்டர்கள் வழங்கப்பட்டன.
இந்த மீட்டர்கள் பொதுவாக, ஒரு பல்பு, டியூப்லைட் போன்றவற்றை பயன்படுத்தினால் ஓடாது. அதிக திறனை பயன்படுத்தும், மின்விசிறி, தண்ணீர் மோட்டார், இஸ்திரி பெட்டி போன்றவை பயன்படுத்தினால் தான் மீட்டர் ஓடும். இதனால், சப்ளையாகும் மின்சாரத்திற்கு ஏற்ற வருவாய் மின்துறைக்கு கிடைக்காத நிலை ஏற்பட்டது. இதையறிந்த மின்துறை, நவீன தொழில்நுட்பம் கொண்ட எலக்ட்ரானிக் மீட்டர்களை பொருத்தியது. கடந்த சில ஆண்டுகளுக்கு முன், 100 சதவீதம் கறுப்பு மீட்டர் பெட்டிகளை மாற்றும் முயற்சியில் இறங்கியது. ஆனால், பல காரணங்களால் முழுவதுமாக மாற்ற முடியவில்லை.
தற்போது, மின்வாரிய சேர்மன் ஹன்ஸ்ராஜ் வர்மா உத்தரவின்படி, தமிழகம் முழுவதும் அனைத்து மின்பகிர்மான வட்டங்களிலும் கறுப்பு மீட்டர் பெட்டிகளை, தொழில்நுட்பக் கருவிகள் மேலாண்மைப் பிரிவு கணக்கெடுத்தது. இதில், 150 வட்டங்களில், சராசரியாக 10 ஆயிரம் மீட்டர்கள் வீதம், 18 லட்சம் மெக்கானிக்கல் மீட்டர்கள் பயன்பாட்டில் இருப்பது தெரிய வந்துள்ளது. இதனால், ஆண்டுக்கு 700 கோடி ரூபாய் வரை மின்துறைக்கு இழப்பு ஏற்படுவது கண்டுபிடிக்கப்பட்டுள்ளது. இவ்வாறு அவர் கூறினார்.
இதற்கிடையில், புதிதாக இணைப்பு பெற்ற நுகர்வோர்களுக்கும், பழுதான மீட்டர்களை மாற்றவும், 50 ஆயிரம் மீட்டர்கள் தேவைப்படுகின்றன. இதுகுறித்து, மின்துறை உயரதிகாரி ஒருவர் கூறும்போது, "வீடுகளுக்கான இணைப்புகளுக்கு தேவையான மீட்டர்கள், "ஸ்டாக்' உள்ளன. மும்முனை இணைப்புகளுக்கு தான் பற்றாக்குறை உள்ளது. தற்போது, 15 லட்சம் மீட்டர்கள் தேவை' என்றார். ஆனால், புதிய மீட்டர்கள் வாங்குவதில், கோர்ட் வழக்குகளால் சிக்கல் ஏற்பட்டுள்ளது. வழக்குகள் முடிந்தால் தான், மீட்டர் கொள்முதலுக்கான டெண்டரை மின்வாரியம் அறிவிக்க முடியும் என்பதால், மின்துறைக்கு தொடர்ந்து வருவாய் இழப்பு ஏற்படுகிறது.
பயன்பாட்டுக்கு ஏற்ப புதிய கட்டண முறை: "மின்துறையில் ஏற்படும் இழப்புகளை சரிக்கட்ட, இரவு நேரம் போன்ற பயன்பாடு அதிகமுள்ள நேரத்தில் மட்டும் மின்கட்டண விகிதத்தை அதிகரிக்கலாம்' என, தேசிய எரிசக்தி துறை மாநாட்டில், திட்ட கமிஷன் துணை தலைவர் மாண்டேக்சிங் அலுவாலியா கூறியுள்ளார். இது சாத்தியமா? என்பது குறித்து, மின் வாரிய உயரதிகாரி கூறும் போது,"தற்போது பழுதான மீட்டர்களை மாற்ற வேண்டிய நிலையில் உள்ளோம். "பீக் - அவர்ஸ்' என்ற பயன்பாடு அதிகமான நேரத்தில், கட்டணத்தை கணக்கிட, தனி சாப்ட்வேர் தயாரிக்க வேண்டும். "ஸ்மார்ட் மீட்டர்ஸ்' என்ற நேரத்திற்கு ஏற்ற கட்டணத்தை கணக்கிடும் மீட்டர்கள் பொருத்த வேண்டும். தற்போது அதற்கு வாய்ப்பில்லை' என்றார்.
இழுத்து மூடப்பட்ட சோதனை மையங்கள்! இதுகுறித்து மின்வாரிய தொழில்நுட்ப பொறியாளர் ஒருவர் கூறியதாவது: மின்வாரியத்திற்கு சப்ளையாகும் மீட்டர்களில், 30 சதவீதம் வரை பழுதானவையாக உள்ளன. சில ஆண்டுகளுக்கு முன், பெல், இந்தியா மீட்டர் லிமிடெட், ஐ.எம்.எல்., கேபிடல் போன்ற நிறுவனங்கள் மீட்டர் சப்ளை செய்தன. தற்போது, எல் அண்ட் ஜி., எல் அண்ட் டி., செக்யூர் போன்ற புதிய நிறுவனங்கள் மீட்டர் தயாரிப்பில் உள்ளன. கடந்த முறை சப்ளை செய்த நிறுவனங்கள், 10 ஆண்டு"சர்வீஸ்' செய்வதாகக் கூறினாலும், அந்த சேவை தொடரவில்லை. இதேபோல், மீட்டர்களை பரிசோதிக்க "மீட்டர் ரிலே டெஸ்டிங்' (எம்.ஆர்.டி.,) மையங்கள் 2,600 இடங்களில் செயல்பட்டன. தற்போது, இவற்றில் 80 சதவீதம் மூடப்பட்டு, "ஹைடென்ஷன்' மீட்டர்களுக்கு மட்டும் வட்டத்திற்கு ஒன்று என, 150 மையங்கள் செயல்படுகின்றன. நிறுவனங்கள் தரும் மீட்டர்களை, மின்வாரியம் சோதிக்காமல் சப்ளை செய்வதால், பழுதான மீட்டர்களை மாற்ற முடியாமல், மின்துறைக்கு மறைமுகமாக பலகோடி ரூபாய் இழப்பு ஏற்படுகிறது. இவ்வாறு அவர் கூறினார்.
No comments:
Post a Comment